"فخ الكمال: لماذا قد يقود السعي للمثالية إلى الإدمان"
كتب / الأخصائي أنس عادل محمد
أخصائي نفسي
في رحلة العلاج النفسي، بنكتشف إن الطريق للإدمان مش دايماً بيبدأ بالاستهتار، لكن في كثير من الحالات بنلاقي إن "الكمالية المرضية" بتلعب دور أساسي ومهم جداً في الرحلة دي. وراء الكثير من حالات الإدمان، بنلاقي شخص حاطط لنفسه سقف طموحات ومعايير نفسية مستحيل بشر يوصل لها، وبيربط قيمته كلها بصورة "المثالية" اللي راسمها في خياله.. ولو الصورة دي اتهزت، حياته كلها بتتهز معاها.
الكمالية كـ "سوط" بيجلد الروح
الكمالية هنا مش مجرد رغبة في النجاح، لكنها بتتحول لـ "جلاد" داخلي بيحاسب الشخص بالثانية. الشخص ده لو فشل في شغلانة، أو حس بالخوف، بيختبر "انهيار نرجسي" ووجع ملوش آخر. الإدمان هنا مش بيبقى مجرد بحث عن لذة، هو بيتحول لـ "آلية دفاعية" عشان يسكت صوت الجلاد ده، ويهرب من نار الإحساس بالتقصير والعار اللي بيلازمه لمجرد إنه إنسان بيغلط.
وهم السيطرة وفخ الهروب
الكمالية بتخلي الإنسان عاوز يسيطر على كل حاجة: مشاعره، وانطباعات الناس عنه. وبما إن الواقع فيه "لخبطة" وخرج عن السيطرة، الشخص ده بيتعب جداً. الإدمان بيدي له شعور وهمي بالقدرة الكلية في الأول، أو بيفصله تماماً عن الواقع اللي مش قادر يخليه مثالي. هو بيهرب من "نفسه الحقيقية" اللي شايفة إنها ناقصة، لـ "حالة تخدير" تخليه مبيحسش بوزن المعايير التقيلة اللي حاططها فوق كتافه.
التحرر بيبدأ من "قبول الخدوش"
وعشان كدة، التحرر الحقيقي من الإدمان في الحالات دي مش معناه بس إنك تبطل المادة، لكن معناه إنك تكسر قيد الكمالية. الشفاء بيبدأ لما الشخص يجرؤ إنه يسامح نفسه على بشريته ويقول: "أنا إنسان، ومن حقي أغلط". التعافي هو رحلة التصالح مع "الضعف البشري"، وفهم إن قيمتك مش في إنك تكون "سوبر هيرو"، لكن في إنك كائن حي بيتألم وبيتعلم. لما بنبدأ نبدل "صلابة الكمال" بـ "مرونة التقبل"، الإدمان بيفقد أهم وظيفة كان بيقوم بيها وهي "الهروب".
الخطوة الأولى: اطلب المساعدة عشان تكسر السجن
لو حاسس إنك محبوس في دايرة "المثالية أو الانهيار"، لازم تعرف إنك مش محتاج تواجه الصراع ده لوحدك. طلب المساعدة من متخصص هو أول خطوة شجاعة لكسر سجن الكمالية. المعالج النفسي مش موجود عشان يخليك "كامل"، هو موجود عشان يساعدك تشوف نفسك بعيون فيها رحمة، ويوريك إنك تستحق حياة حرة بجد.. حياة فيها مساحة للخطأ وللتجربة وللنمو بعيداً عن ضغط "الكمال المستحيل".
التحرر الحقيقي هو إنك ترضى تكون "إنت" بكل عيوبك ووجعك، لأنك ساعتها مش هتحتاج تهرب لأي حاجة تخدرك.. هتكون شجاع كفاية إنك تعيش الحياة زي ما هي، مش زي ما كان "لازم" تكون.
تعليقات
إرسال تعليق