بتقول وعي جديد ...... طب لية ؟
بقلم . كوتش / حسام خضر
بنقول وعي جديد ، طب ليه ؟
أيوه، وضروري كمان.
مش عشان بنحب نغيّر كلامنا،
لكن عشان الوعي القديم اتلعب فيه، واتشكّل على مزاج ناس تانية.
بقينا نسمع أكتر ما نفكّر،
ونصدّق أسرع ما نسأل،
ونمشي ورا الكلام العالي والترند السريع من غير ما نفهم إحنا رايحين فين.
النهارده أي فكرة ممكن تتقدّم لك في شكل ضحكة،
فيديو،
جملة قصيرة تهز مشاعرك وتعدّي على عقلك من غير ما تحس.
وعي جديد يعني توقف شوية،
وتسأل:
مين بيكلّمني؟
ليه دلوقتي؟
هو عايز إيه؟
مش كل جديد يتصدق،
ومش كل قديم يتقدّس.
وعي جديد مش معناه رفض ولا هجوم،
هو بس إنك تبقى صاحي،
ما تسيبش حد يفكّر مكانك،
ولا يختار عنك إنت هتصدق إيه.
الوعي مسؤوليتك إنت،
مش لايك، ولا شير، ولا كلام بيتقال.
وعي جديد يعني
تفهم قبل ما تمشي،
وتفكّر قبل ما تحكم،
وتختار وإنت فاهم… مش وإنت منساق.
واللي فاكر إن الوعي مرحلة وصلها،
يبقى لسه ما بدأش يفهم يعني إيه وعي
تعليقات
إرسال تعليق