زرعى دبلان وزرع الجيران صابح
بقلم . د / غادة مصطفى
استشاري صحة نفسية وارشاد اسري وتربوي ولايف كوتش
حياتى مش سعيدة يا ترى ليه
فلانه حياتها أفضل منى وعيالها احسن من عيالى
لو كنت اتجوزت راجل تانى غير جوزى كنت حبقي أسعد
رزقى أقل من معظم إلى اعرفهم علي كل المستويات
الزرع إلى زرعته بيدبل غير الزرع إلى هناك وطبعا لو راحت هناك حتكتشف ان الصورة من بعيد مبهرة وان زرعها أفضل من إلى هناك
والمقارنات طبعا كتير
لو انتَ او انتِ بتعملو كده مبروك عليكم متلازمه العشب الاخضر
هى بتخلى صاحبها علي يقين ان إلى عنده أقل من إلى عند غيره
وطبعا كل الحاجات البعيدة إلى عند الغير أفضل بكتير ولو كانت عنده كانت حياته بقت أفضل
طول الوقت بيدور على إلى مش عندة وعند غيره ولا عمرة بيحس
بالنعم إلى عنده ولا بينيسط بيها طول الوقت مقارنات لصالح
الآخرين ولو الحاجات إلى عندهم عنده كانت بقت حياته أفضل
على كل المستويات عاطفيا وعمليا واجتماعيا وماليا شكل الحياه عموما
العقل هنا بيشوف الصورة من بره وبيتجاهل كل التفاصيل الداخليه إلى ممكن تكون مؤلمه وأصعب من حياته
بتتكون طبعا عن طريق المقارنات المستمرة والتركيز على النقص بدل المتاح وعن طريق تضخيم مميزات الآخرين وتهميش وتقليل قيمه دورة والي بيملكه
وطبعا الابهار المزيف للسوشيال ميديا
بالاضافه إلى الهروب من مواجهه مشاكله الداخليه واليقين ان الآخرين معندهمش مشاكل زيه
وطبعا من علامتها عدم الرضا وتغيير متكرر ناتج عن الملل فى العلاقات والقرارات
ودايما في حيرة ما بعد الاختيار لو كنت اخترت الاختيار إلى مخترتوش مش كان بقي أفضل ونتيجه أفضل
بالاضافه انه معندوش التزام صعب عليه يلتزم على كل مستويات حياته
وطبعا كل داه بيسببله مشاكل مع نفسه ومع إلى حواليه
لانه دايما بيدور علي الكمال والسعاده بعيد بيشوف العيوب فقط في كل إلى حواليه لان المميزات بعيد مع ناس مش موجوده في حياته في ظروف مش متوفره في حياته
وبتكون نتيجه لداه انه بيهمل حياته وعلاقاته لأنها من وجهه نظرة غير جيدة في نسخه مثاليه غير واقعيه موجودة لكن هو ميمتلكهاش
طبعا فى فرق بينها وبين الطموح والسعى
لان الشخص الطموح بيركز على حياته بكل جوانبها وبيبقي عاوز يطور من نفسه ومن حياته وبيبقي شايف مميزات وعيوب كل حاجه يمتلكها ويتمتع بالمميزات ويغير من العيوب بيبقي مقدر كل شيء في حياته عكس متلازمه العشب الاخضر فلو انتَ او انتِ أصحاب متلازمه العشب الاخضر او حتى في سمات منها ياريت تغيرو زاوية الرؤيه حتفرق في حياتكم وحياة الي حواليكم كتير
وأكيد داه مفتاح من مفاتيح كتير بنفتح بيها صندوق أسرار توازن الحياة لحياة اكثر سعادة وجودة
تعليقات
إرسال تعليق