لو عندك ولاد وبنات في نفس البيت.. خلي بالك من شويه التعليمات دى👇 بقلم : د / الاء حسام ـ النجار مجلة وعي جديد

 👨‍👩‍👧‍👦 لو عندك ولاد وبنات في نفس البيت.. خلي بالك من شويه التعليمات دى👇

بقلم : د / الاء حسام النجار 

وجود ولاد وبنات مع بعض في البيت مش معناه إننا نسيب الأمور عادى كدا وخلاص زى ما تيجى تيجى لا

 في قواعد لازم تتحط علشان نحافظ على الخصوصية و الادب و الاحترام والتربية الصح

📌 1. كل واحد ليه خصوصيته و حياته 

علم ولادك من وهم صغيرين إن ليهم أوضتهم، هدومهم، حاجاتهم اللي ماينفعش حد يلمسها أو يدخل عليها من غير إذن.

📌 2. اللبس جوه البيت مهم زيه زي برّه

مش معنى إننا إخوات نكون لابسين أي حاجة قدام بعض

فيه احترام و آدب حتى وسط أهل البيت.

📌 3. الباب يتخبط و نستأذن قبل ما ندخل 

الولد مايخشش على أخته في أوضتها فجأة

والعكس برضه.. ودي عادة لازم نعودهم عليها.

📌 4. مانضحكش أو نهزر على جسم حد

سواء بنت أو ولد.. 

مافيش هزار في المواضيع دي، 

كل واحد جسمه ليه احترامه و خصوصيته

، وممنوع التنمر بأي شكل.

📌 5. مانقارنش بين البنت والولد

كل حد ليه شخصيته واهتماماته و ميوله و متطلباته و احتياجاته.. 

البنت مش أقل

والولد مش لازم يكون دايمًا أقوى أو أذكى. المساواة في التربية بتخلّي في عدل وسلام نفسي و ود و حب و احترام بين الاخوات

📌 6. الأمان النفسي أول حاجة

ماينفعش يبقى فيه تحرش أو تلميحات او هزار بالايد حتى لو هزار

لازم نحط حدود واضحة من بدري.. 

التربية الصح بتبدأ من البيت.

📌 7. الأم والأب لازم يكونوا قدوة

سلوكنا كأهل بينعكس على ولادنا.. 

لو شايفين الاحترام والحدود و الادب و الموده و الرحمه بينا

هيتعلموا يطبقوها.

✋ التربية مش بس أكل وشرب ومذاكرة و خروجات و فسح ..

دي احترام ومسؤولية و ادب وحدود، علشان نطلع جيل سوي و عقلانى و متربى على الصح و الادب و الحدود و الحلال و الحرام